الموضوع انا المفروض اكون عريس جديد بس الصراحة انا اتعس عريس.
انا اتزوجت في تاريخ 10/2/2012 من بنت خالتي و صراحة صارت مشكلة كبيرة في الزواج و هي ان امي ما دخلت قاعة الزواج و ما زفتني بسبب وجود عمت العروس في القاعة.
الوالدة مقهورة من خواتها اللي هم ام العروس و خالتها لانهم هانت عليهم امي مرمية برع القاعة عند الحمام.
وما سؤلوا عليها مع العلم انهم كانو يمروا من قدام امي و كانت امي تترجاهم عشان يخرجو عمت العروس عشان بس تزفني بس هم كانو يقولو لها تبي تدخلي ادخلي ما تبي بكيفك عمتها ما بنطلعها عشانك. والحين امي منهارة كثير من هذا الموقف.
الزواج كان في السعودية وبعد الزواج اخذت زوجتي و روحنا الامارات بس الصراحة الجو كان متكهرب في بيتنا لان امي صارت مش طايقة تشوف زوجتي بعد اللي صار في الزواج بعد اسبوع من الزواج زوجتي قالت تبا ترجع السعودية عند اهلها عشان تشوف ابوها اللي رجع من السفر بعد غياب 7 سنوات
طبعا انا كنت رافض انها ترجع في هذا الوقت (بعد اسبوع من الزواج) لان الناس بيفسروها اني ما اريدها و قلتلها هذي النقطة بس كانت مصرة على انها تسافر منها عشان تشوف ابوها اللي ما شافته من 7 سنوات و منها عشان تهدا امي من الحالة اللي هي فيها.
طبعا انا كنت رافض لاني كنت اعرف انها اذا راحت امها ما بتخليهاترجع مرة ثانية الا بشروط و هذا اللي صار الحين. المشكلة زوجتي لما كانت عندي كانو اهلها يتصلو فيها في اليوم اكثر من عشر مرات عشان يعرفو ايش اللي صاير في البيت
وزوجتي كانت تقول كل شي ل خالتها ايش يصير في البيت لدرجة مشكلتنا صاروا كل العائلة يتكلمو فيها و طبعا يزودو الكلام من عندهم لدرجة ان اعمامي زاروني امس عشان يتدخلو في الموضوع لانهم سامعين من الناس اني طرت زوجتي او رميتها عند اهلهالكن لما عرفو ان زوجتي راحت برغبتها و ان اهلها الحين رافضين رجعتهاعذروني.
الحين بقول ايش المشكلة اللي بين امي و عمت العروس المشكلة ان في فترة الخطوبة كانت امي شارطة ان عمتها ما تدخل الزواج بس العروس و اهلها كانو رافضين لانها عمتها الوحيدة و بعدين امي عشان تتمم الوضوع تنازلت و وافقت على حضور عمتها بس قبل الزواج باسبوعين
امي كلمت خالي زوج عمت العروس و قالتله امنع زوجتك من حضور الزواج عشان اتهنا بزواج ابني طبعا عمتها اتصلت بزوجتي عشان تعتذر منها انها ما بتحضر الزواج عشان ما تسبب لها مشاكل طبعا زوجتي اصرت ان عمتها تحضر الزواج.
وقبل الزواج ب 4 ايام اتصلت خالتي (ام العروس) تهددني اني غصبن عني بزف بنتها و اننا ضيوف و اننا نجلس مثلنا مثل الناس و اننا اذا ما بنحضر طز فينا عننا ما حضرنا و ان الزواج بيتم بنا او بدوننا طبعا هذا الكلام زعلنا كثير.
المهم الحين زوجتي عند اهلها و انتظر خالي يرجع من السفر عشان يشوف ايش الحل. المشكلة الحين اهلي قالو لي اذا زوجتك بترجع تنسى عمتها و ممنوع تزورها في بيتها لان بنت عمتها ما تزور امي اللي هي عمتها ولا تكلمهابس في العزايم تسلم عليه عادي قدام الناس بس.
طبعا انا كنت متفاهم مع زوجتي و امها قبل الزواج على هذي النقطة انها ما بتزور عمتها الا بموافقة امي و كانت زوجتي و امها موافقين على هذا الكلام بس الحين بعد الزواج تغير الكلام زوجتي صارت تقول هذي عمتي و بتخليني ازورها عصبن عليك و على امك و انا الحين صراحة مش عارف ايش اسوي.
صراحة انا اكتشفت الحين ان البنت مش سهلة وانها خبيثه لدرجة انها تعرف كيف تاخذ اللي تباه و تبيعني اهلي و هذا الشي اللي انا خايف منه لاني الصراحة انا اشوف ان الزوجة اذا خسرتها تتعوض بزوجة ثانية بس الاهل اذا خسرتهم ما لهم تعويض.
ما اعرف ايش الحل ابوي قالي انت لازم تحط النقاط على الحروف باني اقول ل خالي انها تنسى تزور عمتها.
واذا شافتها في العزايم تسلم عليها و تجلس معاها و تسوي اللي تبها بس انها تزورهافي البيت ممنوع على حسب اتفاقنا قبل الزواج ان اذا امي سمحت لها تزور عمتها.
الحين زوجتي تقول لي طرش لي و رقتي و انا صراحة مش عارف ايش اسوي احس اني ما بقدر اكمل معاها لانها خبيثه.
و اذا ما انفصلنا الحين بننفصل بكرة و انا ما اريد اظلمها لان عندي خوات و مش عارف ايش انسب حل لمشكلتي و ما كتبت مشكلتي هني الا لاني مش محصل حل.
ولكم جزيل الشكر
الأخ الكريم: عبدالله:
السلام عليكم ورحمة اله وبركاته.
أشكرك على حرصك وأسأل الله لك التوفيق.
قرأت مشكلتك عدة مرات لأفهم أسباب الخلاف بين الوالدة وعمة الزوجة التي هي زوجة خالكم,غير أني لم أجد أسبابا مذكورة ولعلك رغبة عدم الكشف عنها.
وهذا من حقك لكن الظاهر من عرضك للمشكلة أن هناك خلاف قديم بين الوالدة وزوجة أخيها التي هي عمة الزوجة هذا الخلاف هو الذي جعل الوالدة تصر على عدم حضور عمة الزوجة لحفل الزفاف.
ويظهر لي والله أعلم أن هذا الخلاف سببه قضايا زواج ومشكلات أسرية أخرى وإلا لماذا الإصرار على القطيعة والمنع من حضور فرح ينتظره أفراد الأسرة عادة بلهفة وسرور.
ابني عبدالله:
اعتقد أن من حق الزوجة أن يكون من رأيها حضور عمتها فهي من أقرب أفراد الأسرة و لو كنت مكانها لما رضيت أن تمنع عمتك من الحضور.
لعك واقع الآن في حيرة بين إرضاء الزوجة وإرضاء الوالدة ولك منهم حق عليك يجب أن تؤديه لتستقر الحياة الزوجية.
لذا أقترح عليك وفقك الله الآتي:
1- بحث سبب الخلاف الذي أوصل العلاقة بين الوالدة وعمة الزوجة لهذا الحد من التوتر والسعي لعلاجه بكل وسيلة ممكنة.
2- بعد المعرفة يكون العلاج بتدخل العقلاء من الرجال الكبار الذي لهم قدر واحترام في أسرتكم وتذكير الوالدة والخالة والعمة بعاقبة قطية الرحم فالذنب عظيم على من أصر على القيعة.
3- عدم تحميل الزوجة الذنب فلها الحق في حضور عمتها لفرحها كما حضرت عماتك وخالاتك.
4- في الأمارات لجان رسمية وخيرية لعلاج المشكلات الأسرية وكذا عدنا ي السعودية حيث تسكن الزوجة تستطيع التواصل معها والاستفادة من خدماتها.
5-لعل في حضور زوج الخالة من السفر وكذا الخال خير في دخولهم بينكم لتقريب القلوب وإزالة الشحناء.
6- هذه القطيعة من كيد الشطان الذي يفرح بمثل حالكم فلا تعينوا الشيطان عليكم.
7- تستطيع التواصل المباشر من المستشارين الأسريين والحديث معهم في الأحساء أو الدمام على الهاتف الموحد 920000900
الكاتب: الشيخ صالح بن عبد العزيز التيسان
المصدر: موقع المستشار
